Maak jou besproeiing gereed vir die uitdagings van die somer. Ons het met JH Potgieter, een van ons ervare besproeiingsontwerpers, gesels oor hoe plante se waterbehoeftes verander in die warmer maande — en hoe slim beplanning ’n groot verskil kan maak.
Besproeiing raak ’n bietjie meer uitdagend in die warmer maande. Gelukkig werk ons met die beste van die beste. Ons het met een van ons besproeiingsontwerpers in Caledon, JH Potgieter, gesels oor hoe besproeiingstelsels verskil in die somermaande.
Volgens JH raak ’n plant se waterbehoefte of -gebruik hoër, hoe meer uitdagend of warmer die omgewing raak waarin dit groei. “Dit is die kernwaarheid waarbinne ons ons besproeiingstelsels moet ontwerp, om deur middel van die stelsel die water wat ‘verlore’ gaan teen ’n voldoende tempo weer aan te vul,” verduidelik hy.
Plante absorbeer water vanuit die grondprofiel en verloor dit weer deur hul huidmondjies via die proses van transpirasie. “Slegs sowat 10% of minder van die water wat ’n plant opneem, word in die plantweefsel behou. Byna alles gaan verlore om die plant af te koel,” sê JH.
Hy verduidelik dat die tempo van transpirasie hoog is wanneer verdamping normaalweg hoog is — dus onder droë, warm, winderige toestande. Dit is laer onder koel, vogtige toestande. “Die hoeveelheid water wat opgeneem en deur transpirasie verloor word, bepaal dus die waterbehoefte van die plant,” sê JH.
Hy voeg by dat die werklike waterbehoefte egter nie net deur die heersende weerstoestande bepaal word nie, maar ook deur die tipe, ouderdom, gesondheid en voedingstatus van die plant — asook die oop- en toemaak van die huidmondjies, soos hulle op lig en watertekorte binne die plant self reageer.
Die tempo waarteen waterverdamping plaasvind hang af van:
- Humiditeit
- Temperatuur
- Straling
- Lugbeweging
- Hoogte bo seespieël
