Overberg Agri se jaarlikse Boeredag word op Donderdag 29 Augustus op ons proefplaas Roodebloem gehou. Die proefplaas is op die N2-snelweg, ongeveer 11 km oos van Caledon, geleë.
Die politieke kommentator en joernalis, Max du Preez, is die dag se spreker. Hy is ’n genoot in toegepaste leierskapswaardes aan die Universiteit van Fort Hare en ’n ere-navorsingsgenoot by die Sentrum vir Film- en Mediastudies aan die Universiteit van Kaapstad. Hy is in 2006 met die gesogte titel “Yale Globalist International Journalist of the Year” bekroon.
Du Preez is ook die ontvanger in 2008 van die SA Nasionale Redakteursforum en Print Media SA se gesogte Nat Nakasa-toekenning vir integriteit en moed in die joernalistiek.
Benewens Du Preez se aanbieding sorg die program vir implemente- en gewasdemonstrasies, sowel as insigte in die mees onlangse navorsingsprojekte wat die span van Overberg Agri op Roodebloem onderneem.
Die Boeredag gaan vir seker ’n wonderlike geleentheid wees! Ons hoop om u daar te sien. Om te RSVP, stuur asseblief ’n e-pos aan Michael Gregory by michaelg@overbergagri.co.za
