Met Vadersdag om die draai het ons dit goed gedink om met ‘n paar boerepa’s in die gemeenskap te gesels. Die eerste hiervan was Jan Fick van Vaalplaas, naby Caledon. Hierdie plaas is die tuiste van die Fick-familie vir al meer as tweehonderd jaar (ses geslagte). Volgens Jan, is ons land se landbousektor is in goeie hande met vandag se jeug, omdat daar goeie belangstelling is, en ‘n wil om beter te boer.
Jan Fick glo pa’s het ‘n baie groot rol te speel in die landbousektor in terme van advies. “Ons het die ondervinding oor jare wat ‘n mens nie kan aangee nie, maar wel op deurlopende basis kan probeer oordra. [Die jeug] het weer die inisiatief en honger vir nuwe tegnologie en ek dink die kombinasie werk uitstekend,” sê hy. Jan sê sy pa het beslis gehelp met sy verstaan van boerdery. Hy glo jy kan seker maak jou landboubesigheid is suksesvol wanneer jy eendag weg is, deur ‘n gesonde en gemaklike verhouding met jou seun te kweek sodat hy ontvanklik is vir advies van jou kant af. “Julle [moet] ook as ‘n span saam werk en nie ‘n ek-is-nog-die-baas- en ek-sal-sê-hoe-dinge-gedoen-word houding hê nie,” sê hy.
Sover het Jan nog nie kans gehad om te dink aan Vadersdag-planne nie, maar hy sal verseker dit met sy familie spandeer.
