Tian Lourens, besproeiingsontwerper by Overberg Agri, het onlangs die Suid-Afrikaanse Besproeiingsinstituut (SABI) se gesogte nasionale eksamentrofee ontvang. Willie Vosloo, voorsitter van SABI, het die trofee by ’n banket en prysuitdelingsdinee gedurende die nasionale SABI-jaarkongres van 2019 in KwaZulu-Natal aan Tian oorhandig.
Die trofee is ter erkenning van Tian se topprestasie in SABI se nasionale eksamen – ’n hoog aangeskrewe tegniese eksamen vir besproeiingsontwerpers, soortgelyk aan die eksamen van ’n rekeningkunde- of dergelike beroepsraad. Sodra ’n ontwerper hierdie eksamen geslaag het, ontvang hy/sy die status van “SABI-goedgekeurde besproeiingsontwerper”, wat hoog aangeslaan word deur die bedryf.
Doeltreffende waterbestuur is ’n al hoe groter kwessie in die landbou, en die onlangse droogte in die Wes-Kaap het dít opnuut onderstreep. Die soeke na instrumente en metodes om water te bespaar, is daarom noodsaaklik vir die toekomstige sukses van die landbousektor, nie net in Suid-Afrika nie, maar wêreldwyd. Overberg Agri se kundige span streef daarna om op hoogte te bly van die jongste ontwikkelings in omgewingsvriendelike besproeiingspraktyke deur gereelde opleiding te ondergaan. SABI se toewyding aan waterbesparing maak dié instituut ’n uitstekende vennoot in hierdie verband.
Ons is besonder trots op Tian vir sy onverpoosde werk om sy kennis op hierdie gebied voortdurend uit te brei.
Baie geluk!
