Plantpresies Voorplant Inligtingsdag 2026
Praktiese insigte vir die komende wintergraanseisoen
Die Plantpresies Voorplant Inligtingsdag in Moorreesburg het produsente, landboukundiges en bedryfskenners bymekaar gebring om waardevolle insigte te deel ter voorbereiding van die komende wintergraanseisoen. Die program het gefokus op weerpatrone, kultivar-evaluasies, terugvoer oor die 2025-oes, tegnologie, plaagbestuur en praktiese bestuursriglyne om risiko beter te bestuur.
Die dag het navorsing, praktiese ervaring en bedryfskennis saamgebring om produsente te help om meer ingeligte besluite vir die nuwe seisoen te neem. Hieronder is die aanbiedings van die dag.
Langgewens Navorsingsplaas: Stelselboerdery in die praktyk
Rens Smit (DLWK)
Rens Smit het gefokus op die waarde van geïntegreerde stelsels in die Swartland, waar navorsing saam met produsente gedoen word om praktiese oplossings te ontwikkel. Langtermynproewe wys dat wisselbou met vee en peulgewasse insetkoste kan verlaag, grondgesondheid verbeter en stelselstabiliteit verhoog. Die klem het geval op winsgewendheid oor tyd en hoe stelselbestuur produsente help om klimaats- en insetdruk beter te hanteer.
Weervoorspelling: Wat om te verwag vir die 2026-seisoen
Dr Peter Johnston
Dr Peter Johnston het insigte gedeel oor seisoenale klimaatvooruitsigte en hoe produsente dit prakties kan interpreteer. Die fokus was op waarskynlikhede eerder as presiese reënvaltyding. Die vooruitsigte dui op benedenormale reënval vir die suidwes-Kaap vanaf herfs tot winter, met bogemiddelde temperature. Produsente is aangemoedig om bestuurspraktyke soos waterbewaring en grondgesondheid te prioritiseer om risiko beter te bestuur.
Kultivar-evaluasie: Koring en Hawer
Petrus Delport (LNR)
Petrus Delport het terugvoer gegee oor die 2025-kultivarproewe vir koring en hawer in die winterreënvalgebied, gebaseer op resultate uit verskeie Swartland-lokaliteite. Die proewe het duidelike verskille in opbrengs, kwaliteit en stabiliteit tussen kultivars getoon. By hawer is beide graanopbrengs en biomassa beklemtoon. Produsente is aangeraai om kultivarkeuses te baseer op streekspesifieke prestasie en meerjarige resultate.
Kultivar-evaluasie: Canola en Lupiene
Piet Lombard (DLWK)
Piet Lombard het insigte gedeel oor canola- en lupienkultivars in die Swartland en Suid-Kaap, met fokus op opbrengs en bestuursimplikasies. CL-kultivars soos 44Y94, PY421C en Solstice CL het oor tyd sterk en stabiel presteer, terwyl TT-kultivars tipies 10–20% laer opbrengste toon. Die skuif weg van konvensionele kultivars na nuwe tegnologieë beklemtoon die belangrikheid van strategiese kultivarkeuse.
Weidingbestuurstrategieë: Dekgewasse en beweiding in bewaringslandbou
Rebecca Ellerbeck (SU MSc Agronomie)
Rebecca Ellerbeck het gedeel hoe dekgewasse onder verskillende beweidingstrategieë in ’n bewaringslandboustelsel benut kan word. Die navorsing het gewys dat veeintegrasie moontlik is sonder afname in diereprestasie of noemenswaardige grondagteruitgang. Die kernboodskap was dat sukses meer deur klimaat en ’n goed gekalibreerde drakrag beïnvloed word as deur die beweidingstrategie self.
Oes 2025: Terugblik en sleuteltendense vir die Swartland
Wynand Heunis (Overberg Agri)
Wynand Heunis het ’n oorsig gegee van die 2025-oes, met fokus op klimaatstoestande, opbrengste, kwaliteit en markverwante faktore. Data het gewys dat reënval onder die langtermyn gemiddeld was, wat produksie beïnvloed het. Ten spyte hiervan bly historiese data ’n kritiese hulpmiddel vir beter besluitneming en risikobestuur in toekomstige seisoene.
Overberg GET: Jou produksie-inligting op een plek
Overberg Agri
Overberg GET is uitgelig as ’n kragtige digitale platform wat produsente se finansiële, graan- en produksie-inligting sentraliseer in een eenvoudige, toeganklike stelsel. Met funksies soos produksiebeplanning, graanaflewerings, finansiële oorsigte en aanlyn bestellings, help dit produsente om tyd te bespaar en beter besluite te neem — beskikbaar op beide web en mobiele toep vir gerief onderweg.
Ken jou koringsiektes: Voorkoming begin by begrip
Prof Zakkie Pretorius (Borg InteliGro)
Prof Zakkie Pretorius het gefokus op die identifisering en bestuur van belangrike koringsiektes. Daar is onderskei tussen monosikliese en polisikliese siektes, met klem op tydige en voorkomende bestuur. Faktore soos kultivar-keuse, vog, temperatuur en oesreste speel ’n groot rol in siekteontwikkeling. Die gebruik van weerstandbiedende kultivars, saadbehandeling en doelgerigte fungisiedienste bly kern tot effektiewe siektebeheer.
Duur insette, lae marges: Riglyne vir effektiewe bemesting
Jacques Smith (Borg Yara)
Jacques Smith het gefokus op die uitdaging van stygende insetkoste en lae marges, en hoe produsente bemesting meer doeltreffend kan bestuur. Die 4R (5R)-bemestingsbeginsel is uitgelig as raamwerk vir optimale resultate, met klem op regte bron, dosis, tyd en plek. Praktiese gebruik van grond- en blaarontledings, asook presisieboerdery, speel ’n sleutelrol om opbrengs en winsgewendheid te verbeter.
Bestuur die grond, bestuur die seisoen
Schalk du Plessis (Agri Technovation)
Schalk du Plessis het gefokus op die belangrikheid van grondbestuur as fondament vir volhoubare produksie. Hy het verduidelik hoe produsente deur beter begrip van grondgesondheid, vogbestuur en data-gedrewe besluitneming hul risiko kan bestuur en seisoenale uitdagings beter kan hanteer. Die gebruik van tegnologie en monitering speel ’n sleutelrol om insette te optimaliseer en opbrengspotensiaal te stabiliseer.
Kleingraan planter optimalisering
Bert Badenhorst (Equalizer)
Bert Badenhorst het gefokus op die optimalisering van kleingraan planters om ’n egalige en doeltreffende vestiging te verseker. Hy het praktiese riglyne gedeel rondom plantspoed, bewerkingsdiepte en die korrekte nivellering van die planter. Deur aandag te gee aan hierdie instellings, kan produsente beter opkoms, meer eenvormige stande en uiteindelik verbeterde opbrengste behaal.
