Die 30ste Overberg Agri Roodebloem Boeredag vind op Woensdag, 23 September 2026 plaas en vier vanjaar ’n besondere mylpaal in die geskiedenis van hierdie geliefde landbougeleentheid vir ons Overberg Agri-produsente en genooide vennote.
Roodebloem Boeredag bied reeds drie dekades lank aan ons produsente ’n waardevolle geleentheid om saam met landboukundiges en bedryfsvennote kennis te deel, ontwikkelinge in die landbou te verken en bande in die bedryf te versterk.
In 2026 sien ons daarna uit om ons produsente en genooide vennote te verwelkom ter viering van die 30ste Roodebloem Boeredag, met ’n vol program van praktiese landboukennis, gewas- en masjineriedemonstrasies, kundige insette en natuurlik die Roodebloem-gasvryheid wat oor die jare ’n integrale deel van die dag geword het.
’n Vol Dag van Landbou, Kennis en Gesprek
Die dag begin om 08:15 met registrasie en ontbyt, gevolg deur die amptelike opening, Skriflesing en gebed om 09:15.
Vanaf 09:30 verskuif die fokus na die land met gewasdemonstrasies en boerderypraktyke, waar ons produsente praktiese toepassings en ontwikkelinge relevant tot hul boerderybedrywighede kan verken.
Ná middagete om 12:30 gaan die middagprogram om 13:30 voort met masjineriedemonstrasies wat op die volledige produksieketting – van plant tot oes – fokus.
Paneelbespreking: Die Pad van die Produsent – Veranderinge, Uitdagings & Lesse
Om 15:00 verskuif die fokus na die mense wat die hart van landbou vorm met ’n spesiale paneelbespreking, “Die Pad van die Produsent – Veranderinge, Uitdagings & Lesse”.
Onder leiding van fasiliteerder Theo Vorster bring die gesprek vyf produsente – Jan Viljoen, Tienie Theunissen, Johan Swart, Philip Morkel en Francois Uys – bymekaar om perspektiewe en ervarings uit hul eie landboureise te deel.
Die gesprek sal kyk na hoe boerdery oor die jare verander het, die uitdagings wat produsente moes trotseer en die lesse wat langs die pad geleer is. Dit bied ’n geleentheid om eerstehands van produsente te hoor oor die realiteite van boerdery en die ervaring wat deur veranderende seisoene en ’n voortdurend ontwikkelende landbou-omgewing opgebou is.
Hoofspreker: Theo Vorster
Om 16:00 neem Theo Vorster weer die verhoog vir die hoofrede.
Theo is die Hoof Uitvoerende Beampte van Galileo Capital en is bekend vir sy vermoë om komplekse ekonomiese, finansiële en politieke ontwikkelinge op ’n relevante en verstaanbare manier uiteen te sit. Hy lewer gereeld kommentaar as ekonomiese en markontleder op nasionale televisie, radio en sakeplatforms.
Sy praktiese benadering en kennis van die Suid-Afrikaanse ekonomiese en sakeomgewing maak sy insigte besonder relevant vir produsente wat binne ’n toenemend komplekse bedryfsomgewing moet beplan en besluite neem.
Die formele program sluit om 17:00 af, waarna aandete en ’n gesellige saamkuier vanaf 17:30 volg – ’n gepaste afsluiting vir ’n dag wat oor landbou, kennis en die verhoudings gaan wat Roodebloem Boeredag oor die jare gevorm het.
Ons Vier 30 Roodebloem Boeredae
Die 2026-geleentheid vier 30 Roodebloem Boeredae en drie dekades waarin ons produsente en landbouvennote saamgebring is rondom kennis, innovasie, praktiese ervaring en verhoudings.
Deur die jare het die dag saam met die landboubedryf ontwikkel, maar die kern daarvan het dieselfde gebly: om aan ons produsente die geleentheid te bied om bymekaar te kom, te leer, ervarings te deel en verhoudings binne die landbougemeenskap te versterk.
Kyk Terug na Roodebloem Boeredag 2025
Wil jy ’n voorsmakie kry van wat om by Roodebloem te verwag?
Kyk terug na Roodebloem Boeredag 2025 en beleef van die mense, gesprekke, demonstrasies en oomblikke wat die dag besonders gemaak het.
Kyk na die 2025 Roodebloem Boeredag-video op YouTube
Vier Saam met Ons Produsente
Ons sien daarna uit om ons Overberg Agri-produsente en genooide vennote op Woensdag, 23 September 2026 by Roodebloem te verwelkom om hierdie besondere mylpaal saam te vier.
Program: Besigtig die volledige program vir die 30ste Roodebloem Boeredag.
Hou ons Facebook-blad en YouTube-kanaal dop vir verdere nuus en opdaterings in die aanloop tot die 30ste Overberg Agri Roodebloem Boeredag.
