Bulk & Blêr Herkouersdag Swartland 2026
Praktiese insigte vir lam- en kalftyd
Die Bulk & Blêr Herkouersdag Swartland, wat op 24 Junie 2026 by die Moorreesburg Skougronde aangebied is, het op die belangrike lam- en kalftyd gefokus. Die program het voeding, kuddegesondheid, lam- en kalfkomplikasies en algemene veesiektes gedek.
Die dag het praktiese inligting gebied om produsente te help om dieregesondheid voor, tydens en ná lam- en kalftyd beter te bestuur. Hieronder is die aanbiedings wat van die dag beskikbaar is.
Voeding: “Do’s and Don’ts” tydens lam- en kalftyd
Dr Ashley Grimsell (Voermol)
Dr Ashley Grimsell het gefokus op voedingsbestuur voor en ná lam- en kalftyd, insluitend liggaamskondisie, proteïen- en energiebehoeftes, metaboliese steurnisse en kruipvoer. Korrekte voeding speel ’n belangrike rol in oorlewing, produksie en volhoubare kuddebestuur.
Belangrike kuddegesondheidsfaktore rondom lam- en kalftyd
Dr JG Nel (Kyron)
Dr JG Nel het belangrike kuddegesondheidsfaktore voor, tydens en ná lam- en kalftyd uitgelig. Die aanbieding het biesmelk, inentings, spoorelemente en vitamiene, metaboliese toestande, pasgebore diere se gesondheid en wurmladings ingesluit.
Slenkdalkoors: Inentingsoorwegings
Dr Suenette Kotze
Dr Suenette Kotze het op Slenkdalkoors en inentingsopsies gefokus. Die aanbieding het onderskei tussen geïnaktiveerde en lewende entstowwe en die gebruik daarvan by dragtige diere en nie-teeldiere.
Lam- en kalfkomplikasies: Wanneer is daar ’n probleem?
Dr Lizane Murphy
Dr Lizane Murphy het die fases van geboorte, algemene oorsake van lam- en kalfkomplikasies en tekens dat hulp benodig word, bespreek. Die aanbieding het ook uitgelig wanneer veeartsenykundige ingryping nodig kan wees.
Cryptosporidiose in kalwers en lammers
Dr Stian Wessels (TAH Darling)
Dr Stian Wessels het cryptosporidiose in kalwers en lammers bespreek, insluitend oordrag, kliniese tekens, diagnose en voorkoming. Die toestand kan tot vrektes, gewigsverlies, groeivertraging en groter vatbaarheid vir ander siektes bydra.
Koksidiose: Diagnose en bestuur
Dr Ida Glover
Dr Ida Glover het op koksidiose as ’n oorsaak van diarree en swak groei by jong diere gefokus. Die aanbieding het die lewensiklus, diagnose deur middel van ’n mismonster en die belangrikheid daarvan om die oorsaak voor behandeling te bevestig, uitgelig.
Bloednier
Dr Martinus Jacobs
Dr Martinus Jacobs se aanbieding het op bloednier gefokus.
Bek-en-klouseer: Wes-Kaapse stand van sake
Dr Leana Janse van Rensburg (Staatsveearts, Malmesbury)
Dr Leana Janse van Rensburg het ’n oorsig van die bek-en-klouseer-situasie in die Wes-Kaap gegee. Die aanbieding het die verspreiding van die siekte, die provinsiale situasie, bewegingsbeheer, biosekuriteit op plase en die uitrol van inenting gedek.
Overberg Agri Kollig: Roodebloem Proefplaas
Francois du Toit (Overberg Agri)
Francois du Toit het ’n oorsig van Roodebloem Proefplaas en sy rol in skaap- en graannavorsing gegee. Hy het ook deurlopende projekte, inligtingsdae en die proefplaas se fokus op meer waarde uit bestaande hulpbronne deur vertikale groei uitgelig.
