Voorplant Inligtingsdag 2026
Praktiese insigte vir die komende wintergraanseisoen
Die Voorplant Inligtingsdag by Rietpoel het produsente, landboukundiges en bedryfskenners bymekaar gebring om waardevolle insigte te deel ter voorbereiding van die komende wintergraanseisoen. Die program het gefokus op weerpatrone, kultivar-evaluasies, terugvoer oor die 2025-oes, tegnologie soos Overberg GET, plaagbestuur, presisielandbou en risikobestuur in landbou.
Die dag het navorsingsresultate, praktiese ervaring en bedryfsinsigte saamgebring om produsente te help met ingeligte besluite vir die nuwe seisoen. Hieronder volg die aanbiedings van die dag.
Weerpatrone en voorspelling
Lauren Smith (SA Weerdiens)
Lauren Smith van die Suid-Afrikaanse Weerdiens het ’n oorsig gegee van die afgelope seisoen se weerpatrone en ’n vooruitskouing vir die komende maande. Die aanbieding het gefokus op reënvalvooruitsigte, ENSO-klimaatstoestande en moontlike implikasies vir wintergraanproduksie en waterbestuur in die Overberg.
Koring- en hawerkultivar evaluasie
Petrus Delport (LNR)
Petrus Delport van die Landbounavorsingsraad het die jongste resultate uit koring- en hawerkultivarproewe gedeel. Die fokus was op opbrengsvergelykings, aanpasbaarheid in verskillende produksiegebiede en belangrike eienskappe wat produsente kan help met kultivarkeuses vir die komende seisoen.
Canolakultivar evaluasie
Piet Lombard (DLWK)
Piet Lombard van die Wes-Kaapse Departement van Landbou het die jongste resultate van canolakultivarproewe bespreek. Die aanbieding het kultivargroepe, opbrengsresultate en bestuursaspekte uitgelig wat produsente kan help met kultivarkeuses en produksiebeplanning vir die komende seisoen.
Garskultivar evaluasie
Daniel de Klerk (SABBI)
Daniel de Klerk van SABBI het ’n oorsig gegee van garskultivarproewe en prestasie in verskillende produksiegebiede. Die aanbieding het gefokus op opbrengsresultate, kultivarkeuses en belangrike bestuursaspekte wat ’n rol speel in suksesvolle garsproduksie.
Oes 2025
Johan Lusse (Overberg Agri)
Johan Lusse het ’n oorsig gegee van die 2025-oes met fokus op klimaatstoestande, oesstatistieke, graankwaliteit en markpryse. Die aanbieding het ook operasionele verbeterings by silo’s en tendense in produksie bespreek om produsente te help met beplanning vir die komende seisoen.
Overberg GET
Christo Prins (Overberg Agri)
Christo Prins het die Overberg GET-platform bekendgestel as ’n sentrale digitale hulpmiddel waar produsente hul produksie-, graan- en finansiële inligting op een plek kan bestuur. Die platform bied toegang tot rekeninginligting, graanaflewerings en aanlyn aankope van landbou-insette.
Slakke: Opsies om probleem aan te spreek
Piet Lombard (DLWK)
Piet Lombard het praktiese bestuursopsies vir slakbeheer bespreek, met fokus op die biologie van slakke, monitering en effektiewe beheerstrategieë. Die aanbieding het chemiese en geïntegreerde bestuursbenaderings uitgelig om skade aan jong gewasse te beperk.
Swamdoder-deposisieproef op kanola: Sleepspuit vs drone vs vliegtuig
Dr Gideon van Zyl (ProCrop)
Dr Gideon van Zyl het navorsingsresultate gedeel oor swamdoder-deposisie op kanola met verskillende toedieningsmetodes, insluitend sleepspuite, hommeltuie en vliegtuie. Die studie het gefokus op spuitvolumes, blaredak-penetrasie en deposisie-effektiwiteit tydens verskillende groeistadia.
Presisielandbou in die praktyk: Navorsing en insigte vanuit die SU-BFAP Leerstoel
Dr Andries Le Roux (SU & BFAP)
Dr Andries Le Roux het praktiese insigte gedeel oor presisielandbou en hoe data en tegnologie produsente kan help om insette meer doelgerig te bestuur. Die fokus was op navorsing, opbrengsvariasie en hoe presisietegnieke beter produksie- en bestuursbesluite kan ondersteun.
Risikobestuur in Landbou: Bronne van risiko en bestuursstrategieë
Dr Willem Hoffmann (Stellenbosch Universiteit)
Dr Willem Hoffmann het die verskillende tipes risiko in landbou bespreek, insluitend produksie-, mark-, finansiële en persoonlike risiko. Die fokus was op praktiese strategieë soos diversifisering, kontrakte en versekering om risiko beter te bestuur.
Wat vertel die syfers: Inligting uit ons studiegroep
Ruben Badenhorst (Overberg Agri)
Ruben Badenhorst het insigte uit Overberg Agri se studiegroepdata gedeel, met fokus op produksie-, kostestrukture en opbrengstendense. Die data help produsente om hul boerdery se prestasie te vergelyk en beter bestuursbesluite te neem.
